तलवारबाजीत आयुष पोकळेची दमदार कामगिरी!

तलवारबाजीत आयुष पोकळेची दमदार कामगिरी!

पुणे विभागीय शालेय स्पर्धेत प्रथम क्रमांक; राज्यस्तरीय स्पर्धेसाठी निवड

कोपरगाव । प्रतिनिधी । क्रीडा क्षेत्रात आपल्या कौशल्याची चमक दाखवत के. बी. रोहमारे कनिष्ठ महाविद्यालयाच्या आयुष पोकळे याने तलवारबाजी स्पर्धेत उल्लेखनीय यश संपादन केले आहे. पुणे विभागीय शालेय तलवारबाजी स्पर्धेत प्रथम क्रमांक मिळवत आयुषने कोपरगावच्या शिरपेचात मानाचा तुरा रोवला आहे. त्याच्या या यशामुळे त्याची सोलापूर येथे होणाऱ्या राज्यस्तरीय शालेय तलवारबाजी स्पर्धेसाठी निवड झाली आहे.

क्रीडा व युवक सेवा संचालनालय, महाराष्ट्र राज्य, पुणे तसेच जिल्हा क्रीडा परिषद आणि जिल्हा क्रीडा कार्यालय, अहिल्यानगर यांच्या संयुक्त विद्यमाने नुकत्याच १४, १७ व १९ वर्षे वयोगटातील मुलांच्या पुणे विभागीय शालेय तलवारबाजी स्पर्धा पार पडल्या. या स्पर्धेत विविध शाळा व महाविद्यालयांतील खेळाडूंनी सहभाग नोंदवला. या स्पर्धेत के. बी. रोहमारे कनिष्ठ महाविद्यालयात अकरावी वाणिज्य शाखेत शिक्षण घेणाऱ्या आयुष पोकळे याने आपल्या कौशल्याच्या जोरावर प्रथम क्रमांक पटकावला.तलवारबाजीसारख्या खेळात चपळता, अचूकता, एकाग्रता, प्रसंगावधान आणि सातत्यपूर्ण सरावाला विशेष महत्त्व असते. या गुणांच्या जोरावर आयुषने विभागीय स्तरावर यश मिळवत राज्यस्तरीय स्पर्धेत प्रवेश निश्चित केला आहे. आता सोलापूर येथे होणाऱ्या राज्यस्तरीय स्पर्धेत आयुष कशी कामगिरी करतो, याकडे क्रीडाप्रेमींचे लक्ष लागले आहे.आयुषने मिळवलेल्या या यशाबद्दल कोपरगाव तालुका एज्युकेशन सोसायटीचे अध्यक्ष, विश्वस्त, सचिव व सर्व पदाधिकारी यांनी त्याचे अभिनंदन केले. तसेच महाविद्यालयाचे प्राचार्य डॉ. विजय ठाणगे आणि उपप्राचार्य प्रा. बाळासाहेब सोनवणे यांनी आयुषचे कौतुक करून त्याला पुढील स्पर्धेसाठी शुभेच्छा दिल्या.आयुषच्या या यशामुळे महाविद्यालयाच्या क्रीडा क्षेत्रातील यशात आणखी एक मानाचा अध्याय जोडला गेला असून, राज्यस्तरीय स्पर्धेतही तो यशाची परंपरा कायम राखेल, अशी अपेक्षा व्यक्त केली जात आहे.