सामान्य माणसाचे घराचे स्वप्न पुर्ण करण्याचा राज्यातील पहिला प्रयोग शिर्डी मतदार संघात – पालकमंत्री ना.राधाकृष्ण विखे पाटील
सामान्य माणसाचे घराचे स्वप्न पुर्ण करण्याचा राज्यातील पहिला प्रयोग शिर्डी मतदार संघात – पालकमंत्री ना.राधाकृष्ण विखे पाटील
२१० कुटूंबांना शेती महामंडळाची जमीन उपलब्ध झाल्यामुळे हक्काचे घर तुम्हाला मिळत असल्याचा मोठा आनंद – मंत्री विखे पाटील
शिर्डी । प्रतिनिधी । शासकीय जागेची उपलब्धता करुन, सामान्य माणसाचे घराचे स्वप्न पुर्ण करण्याचा राज्यातील पहिला प्रयोग शिर्डी मतदार संघात झाला असून, २१० कुटूंबांना शेती महामंडळाची जमीन उपलब्ध झाल्यामुळे हक्काचे घर तुम्हाला मिळत असल्याचा मोठा आनंद आहे. प्रधानमंत्री आवास योजनेच्या माध्यमातून सर्वाधिक घरकुल निर्माण करणारा आपला मतदार संघ एकमेव ठरणार असल्याचे जलसंपदा तथा पालकमंत्री ना.राधाकृष्ण विखे पाटील यांनी व्यक्त केले.
निमगाव को-हाळे येथील अतिक्रमीत ग्रामस्थांना शेती महामंडळाच्या जमीनींमधून ५०० चौरम मिटरची जागा घरकुलासाठी विनामुल्य उपलब्ध करुन देण्यात आली आहे. सुमारे २१० कुटूंबांना या जागेचे हस्तांतरण मंत्री विखे पाटील यांच्या उपस्थितीत करण्यात आले. निमगाव को-हाळे येथील सुमारे ४ कोटी १९ लाख रुपयांच्या विकास कामांचा शुभारंभ या निमित्ताने करण्यात आला.
मंत्री विखे पाटील आपल्या भाषणात म्हणाले की, पंतप्रधान नरेंद्र मोदी यांनी सुपर्ण देशात प्रधानमंत्री आवास योजनेला गती देवू न सामान्य माणसाचे घराचे स्वप्न कसे पुर्ण होईल यासाठी योजना तयार केली. राज्यातील महायुती सरकारने या घरकुल योजनेच्या दुस-या टप्याची योजना कार्यान्वित केली असून, यामध्यमातून अहिल्यानगर जिल्ह्यात १ लाख २९ हजार ८७५ घरकुलांना मंजुरी मिळाली आहे. राहाता तालुक्यात ६ हजार ६१४ घरकुल मंजुर झाली असून, भविष्यात सर्वाधिक घरकुलांची योजना यशस्वी करणारा आपला तालुका ठरेल असा विश्वास त्यांनी व्यक्त केला.यापुर्वी घरकुल योजनांना जागेची उपलब्धता नव्हती. आपल्या सर्वांच्या सदिच्छेमुळे महसूल मंत्री असताना शेती महामंडळाच्या जमीन सार्वजनिक प्रयोजनासाठी देण्याचा महत्वपूर्ण निर्णय करता आला. या जमीनींचा उपयोग आता घरकुलांसाठी आपण करीत असून, या जागेची मालकी आज तुम्हाला मिळू शकली याचा सर्वाधिक आनंद मला आहे. १ लाख २० हजार रुपयांच्या अनुदानामध्ये आता राज्य सरकारनेही ५० हजार रुपयांचे अधिकचे अनुदान वाढीव स्वरुपात देण्याचा निर्णय केला असून, घरकुलांच्या वसाहतीला सौरउर्जा प्रकल्प कार्यान्वित करण्यासाठी राज्य सरकार अर्थसहाय्य करीत असल्याचे त्यांनी सांगितले.शिर्डी आणि परिसरातील युवकांसाठी औद्योगिक वसाहतीच्या माध्यमातून रोजगाराच्या संधी निर्माण होणार आहेत. यासाठी कौशल्य प्रशिक्षण केंद्राची उभारणी करण्यात येणार असून, औद्योगिक क्षेत्राला आवश्यक असलेले प्रशिक्षण या माध्यमातून घेता येणार असल्याचे मंत्री विखे पाटील यांनी सांगितले.
को-हाळे येथे २३० कोटी रुपये खर्चून विकसीत करण्यात येत असलेल्या शिर्डी बाह्यवळन कामांचा शुभारंभ मंत्री विखे पाटील यांच्या उपस्थितीत करण्यात आला. निळवंडे, कवठे कमळेश्वर, काकडी, को-हाळे या रस्त्याचे कामही या निमित्ताने सुरु झाले आहे. कुंभमेळ्यापुर्वी हे दोन्हीही मार्ग सुरु व्हावेत अशी अपेक्षा व्यक्त करुन चांगले आणि सुरक्षित रस्ते हीच विकास प्रक्रीयेची वाहीनी आहेत असे नमुद करुन, हे दोन्हीही रस्ते शिर्डीच्या औद्योगिक आणि अध्यात्मिक विकासासाठी महत्वपूर्ण ठरतील असा विश्वास त्यांनी व्यक्त केला.
