समाजसेवेचा ध्यास, तरुणाईचा पुढाकार; बहादरपूर–जवळके रोडवर खड्डे बुजविले, काटेरी झुडपांचीही छाटणी!
समाजसेवेचा ध्यास, तरुणाईचा पुढाकार; बहादरपूर–जवळके रोडवर खड्डे बुजविले, काटेरी झुडपांचीही छाटणी!
समाजसेवेचा ध्यास, तरुणाईचा पुढाकार; बहादरपूर–जवळके रोडवर खड्डे बुजविले, काटेरी झुडपांचीही छाटणी!
कोपरगाव । प्रतिनिधी । सामाजिक बांधिलकी केवळ बोलण्यातून नव्हे, तर प्रत्यक्ष कृतीतून जपली जाते, याचा प्रत्यय बहादरपूर–जवळके रोडवर आला. या रस्त्यावर पडलेल्या खड्ड्यांमुळे वाहनचालकांना होणारा त्रास लक्षात घेऊन परिसरातील तरुणांनी स्वतः पुढाकार घेत खड्ड्यांमध्ये मुरूम टाकून रस्ता सुकर करण्याचा प्रयत्न केला. तसेच रस्त्याच्या कडेला वाढलेल्या काटेरी झाडांच्या फांद्या वाहनचालकांच्या डोक्याला व डोळ्यांना लागत असल्याने जेसीबीच्या साह्याने रस्त्यालगतची झुडपे व काटेरी फांद्यांची छाटणी करून रस्ता मोकळा करण्यात आला.
बहादरपूर–जवळके रस्त्यावर ठिकठिकाणी पडलेल्या खड्ड्यांमुळे वाहनचालकांना अडचणींचा सामना करावा लागत आहे. विशेषतः दुचाकीस्वारांना खड्ड्यांमुळे अपघाताचा धोका निर्माण होण्याची शक्यता होती. त्यातच रस्त्याच्या कडेला वाढलेल्या काटेरी झाडांच्या फांद्या वाहनचालकांच्या डोक्याला आणि डोळ्यांना लागत असल्याने प्रवास करताना त्रास सहन करावा लागत होता. ही परिस्थिती लक्षात घेऊन तरुणांनी सामाजिक जबाबदारीची जाणीव ठेवत प्रत्यक्ष कामाला सुरुवात केली.
हातात फावडे घेऊन खड्ड्यांमध्ये मुरूम टाकण्याबरोबरच जेसीबीच्या मदतीने रस्त्यालगतची काटेरी झुडपे व फांद्या हटविण्यात आल्या. या उपक्रमासाठी आप्पासाहेब रहाणे यांनी आपल्या जेसीबीची मदत उपलब्ध करून दिली. रमेश रहाणे यांनीही या सामाजिक उपक्रमात सहभाग नोंदविला. स्वतःच्या सोयीपेक्षा नागरिकांच्या सुरक्षिततेला महत्त्व देत तरुणांनी केलेल्या या कामातून सामाजिक बांधिलकीचे दर्शन घडले.या उपक्रमात साईनाथ रहाणे, राहुल सरवार, अमोल पाडेकर, साईराम रहाणे, राजेंद्र नेहे, विजय रहाणे, भाऊसाहेब रहाणे आणि रमेश रहाणे यांनी सहभाग घेतला. सर्वांनी एकत्र येत रस्त्यावरील खड्डे बुजविणे आणि काटेरी झुडपे हटविण्यासाठी योगदान दिले. विशेष म्हणजे, अमोल पाडेकर यांनी जेसीबीची मदत उपलब्ध करून दिल्याने रस्त्यालगतची झुडपे हटविण्याच्या कामाला हातभार लागला.
आजच्या काळात सार्वजनिक समस्यांबाबत केवळ तक्रारी करण्यापेक्षा त्या सोडविण्यासाठी आपल्या परीने योगदान देणे महत्त्वाचे आहे. याच विचारातून बहादरपूर–जवळके येथील तरुणांनी पुढाकार घेत नागरिकांना दिलासा देण्याचा प्रयत्न केला. त्यांच्या या कृतीतून गावाच्या विकासासाठी आणि नागरिकांच्या सुरक्षिततेसाठी प्रत्येकाने आपली जबाबदारी ओळखून काम करण्याचा सकारात्मक संदेश मिळाला आहे. समाजहितासाठी एकत्र येणारी तरुणाई हीच गावाची खरी ताकद! बहादरपूर–जवळके रोडवरील तरुणांचा हा उपक्रम सामाजिक एकतेचा आणि कृतीतून समाजसेवा करण्याचा प्रेरणादायी आदर्श ठरत आहे.
