कोपरगावात शुक्रवार पासून ‘दिवाळी हाट’ खरेदी उत्सव – सौ. पुष्पाताई काळे

कोपरगावात शुक्रवार पासून ‘दिवाळी हाट’ खरेदी उत्सव – सौ. पुष्पाताई काळे

दिवाळीच्या सर्वच वस्तू एकाच ठिकाणी मिळणार

कोपरगांव । प्रतिनिधी ।  दिवाळी सणाच्या पार्श्वभूमीवर नागरिकांना दिवाळीसाठी आवश्यक असणाऱ्या विविध वस्तू अल्प दरात एकाच जागेवर खरेदी करण्याची संधी  ‘दिवाळी हाट’ खरेदी उत्सवाच्या माध्यमातून उपलब्ध करून देण्यात आली आहे. नागरीकांचा आवडता हा ‘दिवाळी हाट’ खरेदी उत्सव शुक्रवार (दि.१०) पासून सुरु होणार असल्याची माहिती गौतम बँकेच्या माजी संचालिका व प्रियदर्शनी इंदिरा महिला मंडळाच्या अध्यक्षा सौ.पुष्पाताई काळे यांनी दिली आहे.

दिवाळी सणाला खरेदीसाठी बाहेर पडणाऱ्या नागरिकांना आवश्यक असणाऱ्या उच्च दर्जाच्या वस्तू अल्प दरात एकाच ठिकाणी मिळाव्यात तसेच कोपरगाव शहर व तालुक्यातील बचत गटाच्या महिलांना आर्थिक हातभार मिळावा .गृहोद्योग चालविणाऱ्या अनेक छोट्या व्यावसायिकांना आपली उच्च दर्जाची उत्कृष्ट उत्पादने विक्रीसाठी व्यासपीठ उपलब्ध व्हावे. या दुहेरी उद्देशातून मा. आ. अशोकराव काळे व आ. आशुतोष काळे यांच्या मार्गदर्शनाखाली गौतम बँकेच्या माजी संचालिका सौ. पुष्पाताई काळे व जिल्हा बँकेच्या माजी संचालिका सौ.चैतालीताई काळे यांनी कृष्णाई मंगल कार्यालयात मागील काही वर्षापासून ‘दिवाळी हाट’ हा खरेदी उत्सव सुरु केला आहे. दरवर्षी ‘दिवाळी हाट’ या खरेदी उत्सवाला कोपरगाव तालुक्यासह शेजारच्या तालुक्यातील ग्राहकांचा मोठा प्रतिसाद मिळाला आहे.याहीवर्षी ‘दिवाळी हाट’ हा खरेदी उत्सव शुक्रवार (दि.१०) पासून रविवार (दि.१२) असे तीन दिवस दिवाळी सणाची खरेदी करण्यासाठी सुवर्ण संधी या निमित्ताने मिळणार आहे.दिवाळी सणाच्या निमित्ताने फराळ, सजावटीचे साहित्य, तयार कपडे, पूजा साहित्य, विविध प्रकारचे आकाश कंदील खरेदी एकाच ठिकाणी करता येणार आहे. त्या माध्यमातून होणाऱ्या मोठ्या आर्थिक उलाढालीचा महिला बचत गटांना देखील आर्थिक लाभ होणार आहे. स्थानिक महिला बचत गटांच्या महिलांनी तयार केलेल्या विविध वस्तूंची खरेदी करण्यासाठी ‘दिवाळी हाट’ हि सुवर्णसंधी असून या संधीचा नागरिकांनी लाभ घ्यावा असे आवाहन प्रियदर्शनी इंदिरा महिला मंडळाच्या अध्यक्षा सौ.पुष्पाताई काळे यांनी केले आहे.