अंगारकीच्या पर्वणीला मयुरेश्वराच्या दर्शनासाठी जनसागर; पोहेगावात ३५ ते ४० हजार भाविकांची मांदियाळी!

अंगारकीच्या पर्वणीला मयुरेश्वराच्या दर्शनासाठी जनसागर; पोहेगावात ३५ ते ४० हजार भाविकांची मांदियाळी!

विनोद जवरे । आपले नगर । अहिल्यानगर जिल्ह्यातील कोपरगाव तालुक्यातील पोहेगाव येथील जागृत व नवसाला पावणारा श्री मयुरेश्वर गणपती मंदिरात अंगारक संकष्टी चतुर्थीनिमित्त सुमारे ३५ ते ४० हजार भाविकांनी श्री मयुरेश्वराचे दर्शन घेतले. पहाटेपासूनच भाविकांनी दर्शनासाठी गर्दी करण्यास सुरुवात केली होती. दिवसभर मंदिर परिसरात भक्तिमय वातावरण निर्माण झाले होते. येवला, कोपरगाव, शिर्डी, सिन्नर, नाशिक तसेच परिसरातील विविध गावांमधून भाविक मोठ्या संख्येने पोहेगावात दाखल झाले होते.

शमीच्या छायेत प्रकटलेला स्वयंभू मयुरेश्वर अशी या गणपतीची भक्तांमध्ये श्रद्धा आहे. सुमारे १५० वर्षांची परंपरा लाभलेल्या या जागृत देवस्थानाची ख्याती दिवसेंदिवस वाढत असून, अंगारक संकष्टी चतुर्थीसारख्या विशेष दिवशी भाविकांची संख्या मोठ्या प्रमाणात वाढते. ‘नवसाला पावणारा गणपती’ अशी ओळख असलेल्या मयुरेश्वराच्या दर्शनासाठी दूरवरून भाविक येत असतात.अंगारक संकष्टी चतुर्थीच्या निमित्ताने पहाटेपासूनच मंदिरात धार्मिक विधी, पूजा-अर्चा आणि दर्शनाला सुरुवात झाली. सकाळपासून भाविकांच्या रांगा लागल्या होत्या. महिला, पुरुष, ज्येष्ठ नागरिक तसेच लहान मुलांसह हजारो भाविकांनी शिस्तबद्ध पद्धतीने दर्शन घेतले. अनेक भाविकांनी मयुरेश्वराच्या चरणी नारळ, फुले व नैवेद्य अर्पण करून मनोभावे प्रार्थना केली.

दिवसभर मंदिर परिसरात ‘मयुरेश्वर महाराज की जय’, ‘गणपती बाप्पा मोरया’ अशा जयघोषाने भक्तिमय वातावरण निर्माण झाले होते. अनेक कुटुंबांनी संकष्टीचे औचित्य साधून मयुरेश्वराचे दर्शन घेतले. नवस पूर्ण झाल्यानंतर भाविकांकडून पुन्हा मंदिरात येऊन दर्शन घेण्याची परंपरा असल्यानेही या दिवशी मोठी गर्दी झाल्याचे पाहायला मिळाले.

पोहेगाव हे कोपरगाव-शिर्डी मार्गावरील महत्त्वाचे धार्मिक स्थळ असून, श्री मयुरेश्वर गणपतीच्या दर्शनासाठी येवला, कोपरगाव, शिर्डी, राहाता, सिन्नर, नाशिक यांसह विविध भागांतून भाविक आले होते. काही भाविकांनी पहाटेच मंदिर गाठले, तर दिवसभर वाहनांची मोठी वर्दळ सुरू होती. त्यामुळे पोहेगाव परिसराला जणू यात्रेचे स्वरूप आले होते.मंदिर परिसरात भाविकांसाठी आवश्यक सुविधा उपलब्ध करून देण्यात आल्या होत्या. दर्शनासाठी येणाऱ्या भाविकांना कोणताही त्रास होऊ नये, यासाठी मंदिर व्यवस्थापनाकडून नियोजन करण्यात आले होते. गर्दीच्या पार्श्वभूमीवर भाविकांना शिस्तबद्ध पद्धतीने दर्शन घेता यावे, यासाठी स्वयंसेवकही कार्यरत होते.

अंगारक संकष्टी चतुर्थीनिमित्त होणारी मोठी गर्दी लक्षात घेऊन कोपरगाव ग्रामीण पोलीस स्टेशनचे पोलीस निरीक्षक संभाजी गायकवाड यांच्या मार्गदर्शनाखाली पोलीस बंदोबस्त तैनात करण्यात आला होता. मंदिर परिसर, दर्शन रांग, वाहनतळ तसेच भाविकांची ये-जा यावर पोलिसांकडून लक्ष ठेवण्यात आले.गर्दीचे नियोजन, वाहतूक व्यवस्था आणि भाविकांच्या सुरक्षिततेच्या दृष्टीने पोलिसांनी योग्य नियोजन केले. त्यामुळे दिवसभर हजारो भाविकांची गर्दी असतानाही दर्शन व्यवस्था सुरळीतपणे पार पडली.

पोहेगावच्या श्री मयुरेश्वर गणपतीचे महत्त्व केवळ स्थानिक पातळीपुरते मर्यादित राहिलेले नसून, दिवसेंदिवस या देवस्थानाकडे येणाऱ्या भाविकांची संख्या वाढत आहे. मंदिराची धार्मिक परंपरा, जागृत देवस्थानाची भक्तांमध्ये असलेली श्रद्धा आणि ‘नवसाला पावणारा मयुरेश्वर’ अशी असलेली ख्याती यामुळे अंगारक संकष्टीसारख्या विशेष पर्वणीला येथे मोठी गर्दी होत आहे.अंगारक संकष्टी चतुर्थीच्या निमित्ताने तब्बल ३५ ते ४० हजार भाविकांनी मयुरेश्वराच्या चरणी माथा टेकवत आशीर्वाद घेतला. दिवसभर सुरू असलेली भाविकांची मांदियाळी आणि भक्तिमय वातावरण यामुळे पोहेगाव नगरीत भक्तीचा जागर पाहायला मिळाला.

भक्तांच्या मनातील मयुरेश्वर

“अंगारक संकष्टीच्या निमित्ताने आम्ही कुटुंबासह पोहेगाव येथील श्री मयुरेश्वराच्या दर्शनासाठी आलो. येथे आल्यानंतर मनाला एक वेगळाच आनंद आणि समाधान मिळते. मयुरेश्वर महाराजांवर आमची मनापासून श्रद्धा असून, नवसाला पावणाऱ्या या जागृत देवस्थानाचे दर्शन घेणे ही आमच्यासाठी भाग्याची गोष्ट आहे.”

– सागर दरेकर ( धोंडेवाडी )