रेल्वे मार्गाच्या प्रकल्पग्रस्तांना समृद्धी महामार्गाप्रमाणे मोबदला मिळवून देऊ -आमदार आशुतोष काळे

रेल्वे मार्गाच्या प्रकल्पग्रस्तांना समृद्धी महामार्गाप्रमाणे मोबदला मिळवून देऊ -आमदार आशुतोष काळे

१७ कोटी निधीतून झगडे फाटा-वडगाव पान रस्ता दुरुस्तीचे काम सुरु

कोपरगांव । प्रतिनिधी । नियोजित नाशिक शिर्डी रेल्वेमार्गातील बाधित शेतक-यांना समृध्दी महामार्ग प्रकल्पग्रस्तांप्रमाणे चांगला मोबदला मिळवून देऊ. झगडे फाटा ते वडगावपान रस्ता तिन वेळा दुरूस्त केला. मात्र ठरावीक ठिकाणी तो खराब होत असल्याने आता त्या भागाच्या कॉंक्रीटीकरणासाठी तब्बल सतरा कोटी रूपयांचा निधी मंजूर करून घेतला. त्यामुळे या भागातील रहिवाशांना मोठा दिलासा मिळेल. या संपूर्ण रस्त्याच्या कॉंक्रीटीकरणासाठी १६५ कोटी रूपयांचा निधी मिळेल. त्यासाठी आपला सातत्याने पाठपूरावा सुरू आहे.असे प्रतिपादन आमदार आशुतोष काळे यांनी केले.

कोपरगाव विधानसभा मतदार संघातील पोहेगाव येथे १७ कोटी रुपये निधीतून करण्यात येणाऱ्या झगडे फाटा ते रांजणगाव देशमुख या तालुका हद्दीतील रस्त्याच्या कॉंक्रीटीकरणाच्या कामाचा प्रारंभ त्यांच्या हस्ते करण्यात आला यावेळी ते बोलत होते. ते म्हणाले, समृद्धी महामार्गाप्रमाणे नियोजित नाशिक शिर्डी रेल्वेमार्गातील चांदेकसारे, पोहेगाव, सोनेवाडी, जवळके, शहापूर, बहादाराबाद, बहादरपूर, धोंडेवाडी आदी गावातील प्रकल्पबाधितांना मोबदला मिळवून देण्यासाठी आपण पुढाकार घेऊ. जोपर्यंत जमिनींचे अधिग्रहण होत नाही तोपर्यंत हरकती नोंदविता येतील. त्यासाठी ठराविक मुदत नाही. जोपर्यंत तुमचे समाधान होणार नाही तोपर्यंत आपण संघटीतपणे त्याचा पूर्ण पाठपुरावा करू त्यामुळे शेतक-यांनी काळजी करू नये. आपण शेतक-यां सोबत आहोत.जिरायती ओळख असलेल्या तालुक्यातील तेरा गावात निळवंडेच्या पाण्याने समृध्दी आली. सोनेवाडी परीसरात एमआयडीसी आल्यामुळे जमिनीचे भाव वाढले. नाशिक-शिर्डी रेल्वेलाईनसाठी अधिग्रहीत करण्यात येणाऱ्या जमिनीचा तसेच विहिरी, पाण्याच्या पाईपलाईन आदींचा योग्य मोबदला मिळवून देण्यासाठी ज्याप्रमाणे समृद्धी महामार्गाच्या वेळी संघटीत राहून आंदोलन करून चांगला मोबदला मिळवून दिला. याहीवेळी तसेच संघटीत राहून मुख्यमंत्री देवेंद्रजी फडणवीस, उपमुख्यमंत्री सुनेत्रा पवार, उपमुख्यमंत्री एकनाथजी शिंदे व पालकमंत्री राधाकृष्णजी विखे पाटील यांना साकडे घालू व शेतक-यांना न्याय मिळवून देऊ. यावेळी कर्मवीर शंकरराव काळे सहकारी साखर कारखाना व संलग्न संस्थांचे पदाधिकारी, राष्ट्रवादी काँग्रेस पक्षाचे पदाधिकारी, विविध क्षेत्रातील मान्यवर तसेच परिसरातील नागरिक मोठ्या संख्येने उपस्थित होते.

झगडे फाटा ते वडगाव पान हा रस्त्याच्या कॉंक्रीटीकरणासाठी १६५ कोटींचा निधी आवश्यक आहे. त्यासाठी एडीबी, एनडीबी बँक, एआयडी बँक,आणि कुंभमेळ्यासाठी मंजूर करण्यात येणाऱ्या निधीतून निधीची मागणी आपण लावून धरली आहे. हि मागणी लवकरच मान्य होईल.- आमदार आशुतोष काळे.