अहिल्यानगरसह ग्रामीण भागातील रुग्णांना मिळणार दर्जेदार नेत्रोपचारांची सुविधा; दृष्टिदा आय हॉस्पिटलचे उद्घाटन

अहिल्यानगरसह ग्रामीण भागातील रुग्णांना मिळणार दर्जेदार नेत्रोपचारांची सुविधा; दृष्टिदा आय हॉस्पिटलचे उद्घाटन

केंद्रीय आयुष राज्यमंत्री प्रतापराव जाधव यांच्या हस्ते सोहळा, आमदार सत्यजीत तांबे उपस्थित
अहिल्यानगर । प्रतिनिधी । आयुर्वेदाच्या प्राचीन आणि समृद्ध परंपरेला आधुनिक संशोधनाची जोड देत नेत्ररोगांवर उपचार करणाऱ्या ‘दृष्टिदा आयुर्वेदिक आय हॉस्पिटल अँड रिसर्च सेंटर’चा भव्य उद्घाटन सोहळा उत्साहात पार पडला. केंद्रीय आयुष राज्यमंत्री (स्वतंत्र प्रभार) तथा आरोग्य व कुटुंब कल्याण राज्यमंत्री प्रतापराव जाधव यांच्या शुभहस्ते या केंद्राचे उद्घाटन झाले. या सोहळ्यास आमदार सत्यजीत तांबे, खासदार डॉ. निलेश लंके आणि लोकप्रिय व्याख्याते प्रा. गणेश शिंदे उपस्थित होते.

यावेळी आमदार सत्यजीत तांबे यांनी आयुर्वेदाच्या माध्यमातून आधुनिक उपचारपद्धती विकसित करण्याच्या प्रयत्नांचे कौतुक केले. ग्रामीण भागातील नागरिकांना दर्जेदार आरोग्यसेवा उपलब्ध होण्यासाठी अशा आरोग्य संस्थांचे योगदान महत्त्वाचे असल्याचे त्यांनी नमूद केले.आयुर्वेद ही भारताची प्राचीन आणि समृद्ध आरोग्य परंपरा असून, या परंपरेला आधुनिक संशोधनाची जोड देत नेत्ररोगांवर उपचार करण्याचा दृष्टिदा हॉस्पिटलचा उपक्रम महत्त्वपूर्ण ठरणार आहे. अहिल्यानगरसह परिसरातील ग्रामीण भागातील रुग्णांना नेत्रोपचारांच्या सुविधा उपलब्ध होण्यास या केंद्राची मदत होणार आहे.

रुग्णसेवेचा ध्यास घेऊन सुरू झालेल्या या नव्या सेवापर्वासाठी अरुण (दादा) जाधव, अरविंद जाधव, धनंजय जाधव, डॉ. गणेश जाधव यांच्यासह संपूर्ण जाधव परिवार आणि दृष्टिदा हॉस्पिटलच्या टीमचे अभिनंदन करण्यात आले.



