गुरुवार ठरणार सत्तेचा दिवस! सुजय विखेंच्या नावाने जिल्हा बँकेच्या राजकारणात रंगत!

गुरुवार ठरणार सत्तेचा दिवस! सुजय विखेंच्या नावाने जिल्हा बँकेच्या राजकारणात रंगत!

अहिल्यानगर । प्रतिनिधी । अहिल्यानगर जिल्हा मध्यवर्ती सहकारी बँकेच्या अध्यक्षपदाच्या निवडीसाठी आता अवघे दोन दिवस शिल्लक राहिले असून, जिल्ह्याच्या सहकार आणि राजकीय वर्तुळात घडामोडींना वेग आला आहे. अध्यक्षपदासाठी भाजपचे प्रदेश उपाध्यक्ष सुजय विखे पाटील यांच्या नावाची चर्चा सध्या सर्वाधिक रंगताना दिसत आहे. त्यामुळे आगामी गुरुवारी होणाऱ्या निवडीकडे संपूर्ण जिल्ह्याचे लक्ष लागले आहे. सुजय विखे पाटील यांची अध्यक्षपदी वर्णी लागणार की ऐनवेळी वेगळे नाव पुढे येणार, याबाबत राजकीय वर्तुळात उत्सुकता निर्माण झाली आहे.जिल्हा बँकेच्या निवडणुकीत विखे-थोरात गटाचे संचालक मोठ्या संख्येने निवडून आले असले, तरी अध्यक्षपदाचा निर्णय केवळ संचालकांच्या संख्याबळावर होणार नसून त्यामागे वरिष्ठ पातळीवरील राजकीय समीकरणेही महत्त्वाची ठरणार आहेत. भाजपमधील अंतर्गत समन्वय, जिल्ह्यातील सहकार क्षेत्रातील नेत्यांची भूमिका आणि मुख्यमंत्री देवेंद्र फडणवीस यांचा निर्णय या सर्व बाबी अध्यक्षपदाच्या निवडीत निर्णायक ठरू शकतात.

सुजय विखे पाटील हे भाजपचे प्रदेश उपाध्यक्ष असून जिल्ह्यातील राजकारणात त्यांचे महत्त्वाचे स्थान आहे. जिल्हा बँकेच्या अध्यक्षपदासाठी त्यांच्या नावाची चर्चा पुढे येण्यामागे सहकार क्षेत्रातील अनुभव, राजकीय संपर्क आणि पक्षातील वरिष्ठ नेतृत्वाशी असलेले जवळचे संबंध या बाबी महत्त्वाच्या मानल्या जात आहेत. मात्र, त्यांच्या नावावर अंतिम शिक्कामोर्तब झालेले नसल्याने निवडीपर्यंत राजकीय तर्कवितर्क सुरूच राहणार आहेत.

दुसरीकडे, जिल्हा बँकेचे नवनिर्वाचित संचालक बिपिनदादा कोल्हे यांच्या भूमिकेकडेही लक्ष लागले आहे. ते अध्यक्षपदाच्या शर्यतीत उतरणार का, की वरिष्ठ नेतृत्वाच्या निर्णयाला पाठिंबा देणार, हा प्रश्न चर्चेचा विषय ठरत आहे. आमदार विवेकभैय्या कोल्हे यांचे मुख्यमंत्री देवेंद्र फडणवीस यांच्याशी असलेले जवळचे राजकीय संबंध पाहता, या निवडीत कोल्हे कुटुंबाची भूमिका महत्त्वाची ठरू शकते, अशी चर्चा राजकीय वर्तुळात आहे.

अध्यक्षपदाबरोबरच उपाध्यक्षपदासाठीही अनेक नावांची चर्चा सुरू आहे. रंजित देशमुख यांच्यासह इतर इच्छुकांची नावे चर्चेत असल्याने अध्यक्ष आणि उपाध्यक्षपदाची निवड कोणाच्या बाजूने झुकणार, याची उत्सुकता वाढली आहे. अध्यक्षपदासाठी एका नावावर एकमत झाले, तर उपाध्यक्षपदाच्या निवडीत वेगळे राजकीय समीकरण आकाराला येण्याची शक्यता नाकारता येत नाही.

जिल्हा बँकेच्या अध्यक्ष आणि उपाध्यक्षपदाच्या निवडीसाठी गुरुवार, दि. १२ नोव्हेंबर रोजी सकाळी ११ वाजता होणारी प्रक्रिया आता अवघ्या दोन दिवसांवर येऊन ठेपली आहे. त्यामुळे इच्छुकांच्या हालचालींना वेग आला असून, संचालकांच्या भेटीगाठी आणि वरिष्ठ पातळीवरील चर्चांना महत्त्व प्राप्त झाले आहे.सुजय विखे पाटील यांच्या नावावर शिक्कामोर्तब होणार, बिपिनदादा कोल्हे यांना संधी मिळणार की ऐनवेळी अन्य नाव पुढे येणार, याचे उत्तर गुरुवारीच मिळणार आहे. जिल्हा बँकेच्या अध्यक्षपदाचा हा निर्णय केवळ सहकार क्षेत्रापुरता मर्यादित न राहता आगामी जिल्ह्याच्या राजकीय समीकरणांवरही प्रभाव टाकणारा ठरू शकतो. त्यामुळे दोन दिवसांचा हा कालावधी जिल्ह्याच्या राजकारणासाठी कमालीचा महत्त्वाचा ठरणार आहे.