वेळापूर स्मशानभूमीसाठी जागा मंजूर; आ. आशुतोष काळे यांच्या पाठपुराव्याला यश
वेळापूर स्मशानभूमीसाठी जागा मंजूर; आ. आशुतोष काळे यांच्या पाठपुराव्याला यश
वेळापूर स्मशानभूमीसाठी जागा मंजूर; आ. आशुतोष काळे यांच्या पाठपुराव्याला यश
कोपरगांव । प्रतिनिधी । कोपरगाव तालुक्यातील वेळापूर गावासाठी अधिकृत स्मशानभूमीसाठी जागा उपलब्ध नसल्यामुळे अंत्यविधीसाठी ग्रामस्थांना मोठ्या अडचणींचा सामना करावा लागत होता. विशेषतः भूमिहीन कुटुंबातील व्यक्तीचे निधन झाल्यास अंत्यविधी करण्यासाठी जागेचा गंभीर प्रश्न निर्माण होत होता. अशा वेळी गोदावरी नदीच्या पुलाजवळ अंत्यविधी करावा लागत असे. पावसाळ्यात नदीला पाणी असताना ही अडचण अधिकच गंभीर होत होती. त्यामुळे मृत व्यक्तीच्या अंत्यसंस्कारासारख्या संवेदनशील प्रसंगी कुटुंबीय आणि नातेवाइकांना मोठ्या गैरसोयीला सामोरे जावे लागत होते.या प्रश्नावर कायमस्वरूपी तोडगा काढण्यासाठी वेळापूर ग्रामपंचायतीने एप्रिल २०२२ मध्ये ग्रामसभा घेऊन गट क्रमांक १३७ मधील ३.६७ आर क्षेत्रापैकी ०.६० आर क्षेत्र स्मशानभूमीसाठी उपलब्ध करून देण्याचा ठराव मंजूर केला होता. त्यानंतर ग्रामपंचायतीने आमदार आशुतोष काळे यांच्याकडे लेखी मागणी करून स्मशानभूमीसाठी जागा उपलब्ध करून देण्याची विनंती केली होती.
ग्रामपंचायतीच्या या मागणीची दखल घेत आ. आशुतोष काळे यांनी जिल्हाधिकाऱ्यांकडे पाठपुरावा करून वेळापूर ग्रामस्थांच्या या अत्यंत संवेदनशील आणि मूलभूत प्रश्नावर तातडीने कार्यवाही करण्याची मागणी केली. सातत्याने केलेल्या पाठपुराव्यानंतर गट क्रमांक १३७ मधील ०.४० आर क्षेत्र स्मशानभूमीसाठी मंजूर करण्यात आले आहे. अनेक वर्षांपासून प्रलंबित असलेल्या प्रश्नाला आता कायमस्वरूपी जागा मिळाल्याने वेळापूर ग्रामस्थांना मोठा दिलासा मिळाला आहे.स्मशानभूमीसाठी जागेचा प्रश्न मार्गी लागल्याबद्दल आ. आशुतोष काळे यांनी मुख्यमंत्री ना. देवेंद्रजी फडणवीस, उपमुख्यमंत्री ना. सुनेत्राताई पवार, उपमुख्यमंत्री ना. एकनाथजी शिंदे, महसूल मंत्री ना.चंद्रशेखर बावनकुळे, पालकमंत्री ना. राधाकृष्ण विखे पाटील तसेच मा.जिल्हाधिकारी डॉ.पंकज आशिया यांचे आभार मानले. वेळापूर ग्रामस्थांच्या या महत्त्वपूर्ण अडचणीची गांभीर्याने दखल घेऊन स्मशानभूमीसाठी जागा उपलब्ध करून दिल्याबद्दल ग्रामस्थांनी आ.आशुतोष काळे यांचे आभार मानले आहेत.
