आई-वडिलांच्या घामाला लेकीच्या यशाचा सुगंध; अंजनापूरच्या अपेक्षा गव्हाणे यांची MPSC मध्ये यशस्वी झेप!

विनोद जवरे । प्रतिनिधी । अतिशय प्रतिकूल आणि हलाखीच्या परिस्थितीवर मात करत, जिद्द, मेहनत आणि चिकाटीच्या जोरावर अंजनापूर येथील शेतकरी कुटुंबातील कुमारी अपेक्षा अण्णासाहेब गव्हाणे यांनी महाराष्ट्र लोकसेवा आयोगाच्या (MPSC) परीक्षेत यश संपादन करून महसूल सहाय्यक अधिकारी या मानाच्या पदाला गवसणी घातली आहे. अपेक्षा यांच्या या उल्लेखनीय यशामुळे अंजनापूर गावाच्या शिरपेचात आणखी एक मानाचा तुरा रोवला गेला असून, त्यांच्या यशाचे सर्वत्र कौतुक होत आहे.

अपेक्षा गव्हाणे या अत्यंत कष्टकरी शेतकरी कुटुंबातील कन्या आहेत. त्यांचे आई-वडील शेती व्यवसाय करून कुटुंबाचा उदरनिर्वाह चालवतात. घरची परिस्थिती अत्यंत हालाखीची असतानाही त्यांनी आपल्या मुलीच्या शिक्षणाला प्रोत्साहन दिले. अपेक्षा यांनाही लहानपणापासूनच शिक्षणाची आवड आणि काहीतरी मोठे करण्याची जिद्द होती. घरी असताना अभ्यासासोबतच त्या शेतात आई-वडिलांना कामात हातभार लावत असत. शेतीची कामे, घरची जबाबदारी आणि अभ्यास यांचा समतोल साधत त्यांनी आपल्या ध्येयाकडे वाटचाल सुरू ठेवली.

अनेक अडचणी आणि मर्यादित साधनसामग्री असूनही अपेक्षा यांनी अभ्यासात सातत्य ठेवले. आपल्या मुलीने मोठे अधिकारी व्हावे, हे आई-वडिलांचे स्वप्न होते. त्यासाठी त्यांनी घेतलेले कष्ट, केलेले त्याग आणि दिलेले प्रोत्साहन अपेक्षा यांच्या यशामागील महत्त्वाचा आधार ठरले. आपल्या आई-वडिलांचे स्वप्न पूर्ण करत अपेक्षा यांनी केवळ कुटुंबाचेच नव्हे, तर संपूर्ण अंजनापूर गावाचे नाव अभिमानाने उंचावले आहे.शेतकरी कुटुंबातील मुलगीही जिद्द, मेहनत आणि योग्य ध्येयाच्या बळावर प्रशासकीय सेवेत यश मिळवू शकते, हे अपेक्षा गव्हाणे यांनी आपल्या कामगिरीतून दाखवून दिले आहे. त्यांच्या यशामुळे गावातील विद्यार्थिनी आणि युवक-युवतींना प्रेरणा मिळाली असून, ग्रामीण भागातील मुलींसाठी हे यश विशेष महत्त्वाचे ठरत आहे.

२३व्या वर्षी प्रशासकीय सेवेत यश!

अवघ्या २३व्या वर्षी शेतकरी कुटुंबातील कुमारी अपेक्षा अण्णासाहेब गव्हाणे यांनी MPSC परीक्षेत यश संपादन करून महसूल सहाय्यक अधिकारीपद मिळवले आहे. अत्यंत प्रतिकूल परिस्थितीत जिद्द, मेहनत आणि चिकाटीच्या जोरावर मिळवलेले हे यश उल्लेखनीय आहे. कमी वयात मिळवलेल्या या यशामुळे अंजनापूर गावाच्या शिरपेचात मानाचा तुरा रोवला गेला असून, अपेक्षा यांची कामगिरी ग्रामीण भागातील विद्यार्थी आणि युवतींसाठी प्रेरणादायी ठरली आहे.

अपेक्षा गव्हाणे यांच्या या यशाबद्दल समस्त अंजनापूर ग्रामस्थ, अंजनापूर युवाशक्ती आणि विविध क्षेत्रातील मान्यवरांकडून त्यांच्यावर अभिनंदनाचा वर्षाव होत आहे. तसेच त्यांच्या आई-वडिलांचेही मनःपूर्वक अभिनंदन करण्यात येत आहे. अपेक्षा यांच्या भावी प्रशासकीय वाटचालीस सर्वांनी शुभेच्छा दिल्या असून, त्यांनी आपल्या कार्यातून समाजाची सेवा करावी, अशी अपेक्षा व्यक्त केली जात आहे.