गौतम पॉलिटेक्निकमध्ये शिवजयंती उत्साहात साजरी
गौतम पॉलिटेक्निकमध्ये शिवजयंती उत्साहात साजरी
कोपरगांव । प्रतिनिधी । कर्मवीर शंकरराव काळे एज्युकेशन सोसायटीचे गौतम पॉलिटेक्निक इन्स्टिट्यूटमध्ये छत्रपती शिवाजी महाराजांच्या जयंती निमित्ताने शिवव्याख्याते संतोष कातकडे यांचे शिवव्याख्यानाचे आयोजन करण्यात आले होते. कार्यक्रमाची सुरुवात मान्यवरांच्या हस्ते छत्रपती शिवाजी महाराजांच्या प्रतिमेस पुष्पहार अर्पण करून आणि उत्साही वातावरणात शिवआरती करून करण्यात आली.
यावेळी मार्गदर्शन करताना संतोष कातकडे यांनी शिवरायांच्या जीवनातील विविध पैलूंवर प्रकाश टाकला. त्यांनी शिवरायांचे शौर्य त्यांचे युद्धकौशल्य आणि स्वराज्याची मूळ संकल्पना यावर भाष्य केले. महाराजांच्या आयुष्यातील ऐतिहासिक प्रसंगांचे दाखले देत आजच्या धावपळीच्या युगात तरुणांना आपले करिअर घडवण्यासाठी आणि आयुष्यात यशस्वी होण्यासाठी शिवविचारांची कशी मदत होऊ शकते यावर त्यांनी मोलाचे मार्गदर्शन केले.शिवजयंतीचे औचित्य साधून मेकॅनिकल विभागाच्या विद्यार्थी आणि प्राध्यापकांनी शिर्डी येथील साई सावली अनाथ आश्रमास ठराविक आर्थिक मदत देऊन सामाजिक बांधिलकी जोपासली. यावेळी संस्थेचे निरीक्षक नारायण बारे, प्राचार्य वसीम शेख, कार्यालयीन अधीक्षक अण्णासाहेब बढे यांच्यासह सर्व विभागांचे विभागप्रमुख, प्राध्यापक, शिक्षकेतर कर्मचारी आणि विद्यार्थी मोठ्या संख्येने उपस्थित होते.
